يا مصر قومى وصحى الليل

يا مصر قومى وصحى الليل

أنت يا أنا ..
مين وداك عند الميدان
تروح هناك وتنده لنا
تقولنا .. أنا هنا
من غير كلام فى أعتصام ..
من غير سلاح أو بندقية ..
بمد ايدى بالسلام
الوزير لما شافكم رد قال ..
دول عيال
المبايل والفسبوك ..
معرفش ينطق ..
اصله جاهل
شوية
والسكوت عم المكان ..
بعدها سمعت صوت
بيصرخ
صرخة صدى ..
صرخة هزت أرجاء المكان
الميدان بقى معركة ..
بين بطل وبين جبان
الحكومة راكبة جمل ..
والجبان جايب حصان
والسلاح شوية كلاب ..
مالهمش عازة ف مجتمع
بينى وبينكم ..
أنا اتخيت والقلب خاف ..
و فجاة
بصيت لقيت رجال يا مصر ..
بياخدو بصدرهم كل الرصاص
والدم نازل كيف البحور ..
نازل مغرق جسمهم
وسمعت واحد كان بينده ..
يا جبان يا جبان
مهما تمسك بندقية ..
و تطلق ميت رصاصة
مش مهم دمى ينزف ..
مش مهم أنى أموت ..
لكن اللى حيرنى ..
مسمعتش حد قال لفظة ألم ولا حتى آه
أنتصر الشباب .. وأنسحب الغجر ..
أما اللى صابنى
م المعركة
ما بقيتش عارف آييه اللى صابنى ..
عمال الحن زى القصبجى
وداير انده يا بشر ..
وبقيت جبرتى ماشى ف مصر
بيذيع خبر
يا مصر قومى وصحى الليل ..
هلت علينا الفجرية
راح الضلام وجانا النور ..
نور شباب الافندية
شالو الميدان وزرعوا زهور ..
ريحتها نصر و حرية
اصحى يا مصر وصحى النوم ..
خلاص ما راحو الحرامية
أحييى جيشك وشبابك ..
وأحييى بنتى المصرية
زرعوا الفرح لجنابك ..
ما أنتى أم لوالدية
يا مصر قومى وفكى القيد ..
خلاص هدمنا جدار سجنك
الشمس طالعة ف عز الليل ..
ونورها غطى على المايه
يا مصر قومى وصحى الليل ..
يا أم العيون العسلية
------------
تحياتى الى كل شاب وشابة ورجل وسيدة وولد وبنت وطفل وطفلة .. شاركو
وعزائى الى كل بيت مصرى دفع شهيد وكل جريح نزف نقطة دم فدا مصر ....